by Giorgi 
Binance-მა ევროკავშირში ოპერირების ნებართვა ვერ მიიღო
საბერძნეთის ხელისუფლებამ მსოფლიოში უდიდეს კრიპტოვალუტის ბირჟა Binance-ს ევროკავშირში ოპერირების ნებართვა არ მისცა. ბირჟისთვის ლიცენზიის გაცემაზე უარი ევროკავშირის კიდევ ორმა ქვეყანამ განაცხადა.
კრიპტო ბირჟის ევროპული ოპერაციების ხელმძღვანელმა ჯილიან ლინჩმა (Gillian Lynch) პირობა დადო, რომ „ლიცენზიის მიღების ალტერნატიული გზის“ პოვნას შეეცდება.
„Binance ევროპის დატოვებას არ აპირებს“, – განაცხადა მენეჯერმა Reuters-თან ინტერვიუში.
ლინჩის განცხადებით, ბოლო წლებში Binance-მა შიდა კონტროლისა და მარეგულირებელი მოთხოვნების შესრულების სისტემები მნიშვნელოვნად გააძლიერა. მისი თქმით, კომპანიაში კანონთან შესაბამისობის დაახლოებით 1500 სპეციალისტია დასაქმებული და ბირჟა ევროპული ლიცენზიის მიღებაში ხელის შემშლელ გადაუჭრელ საკითხებს ვერ ხედავს.
Reuters-ის ცნობით, საბერძნეთის უარის შემდეგ, Binance-მა ლიცენზირება ირლანდიისა და ლატვიის მარეგულირებლებთან განიხილა, თუმცა უშედეგოდ. მარეგულირებლებმა ფულის გათეთრების წინააღმდეგ ბრძოლასთან დაკავშირებული მოთხოვნების წინა დარღვევებთან, ბირჟის რთულ საერთაშორისო სტრუქტურასთან და მის „რისკის აღების კულტურასთან“ დაკავშირებით შეშფოთება გამოთქვეს.
Binance-ს ევროკავშირის კრიპტოვალუტების რეგულირების წესდებასთან (MiCA) შესაბამისი ლიცენზიის მისაღებად დაახლოებით ერთი კვირა აქვს. წინააღმდეგ შემთხვევაში, ბირჟა იძულებული იქნება ევროკავშირში ოპერირება შეწყვიტოს.
ცოტა ხნით დრე, გამოცემა Finance Feeds-ის მიერ გამოკითხულმა ექსპერტებმა კრიპტო ბირჟები, ბროკერები და ციფრული აქტივების სფეროში სხვა მომსახურების პროვაიდერები გააფრთხილეს, რომ MiCA-ს მოთხოვნების 1 ივლისამდე დაუკმაყოფილებლობის შემთხვევაში, კომპანიები ევროკავშირის ბაზარზე წვდომის დაკარგვის რისკის ქვეშ აღმოჩნდებოდნენ.
