by shaksen 
საქართველოს ეროვნული ბანკი მოსახლეობას აფრთხილებს — ფრთხილად იყავით კრიპტო აქტივებთან დაკავშირებული საინვესტიციო შეთავაზებების მიმართ
საქართველოს ეროვნული ბანკი მოსახლეობას კიდევ ერთხელ აფრთხილებს იმ კომპანიების შესახებ, რომლებიც კრიპტო აქტივებით ვაჭრობის სახელით მოქალაქეებისგან ფულად სახსრებს იზიდავენ და მაღალი მოგების დაპირებებს გასცემენ.
ეროვნული ბანკის განმარტებით, მსგავსი საქმიანობა შესაძლოა ე.წ. ფინანსური პირამიდის ნიშნებს შეიცავდეს, რომლის მთავარი მიზანი რეალური ბიზნესის განვითარება კი არა, ახალი მონაწილეების მოზიდვა და მათი ინვესტიციებით არსებული ვალდებულებების დაფარვაა. როგორც წესი, მსგავსი სქემები საბოლოოდ იშლება მაშინ, როდესაც ახალი წევრების ან დამატებითი თანხების მოზიდვა შეუძლებელი ხდება.
სებ-ის განცხადებით, ასეთი სქემები განსაკუთრებით მაღალი რისკის შემცველია და მათი დაშლის დროის წინასწარ განსაზღვრა პრაქტიკულად შეუძლებელია.
ეროვნული ბანკი მოქალაქეებს მოუწოდებს, ნებისმიერი ინვესტიციის განხორციელებამდე დეტალურად გადაამოწმონ კომპანიის საქმიანობა, რეპუტაცია, გადამხდელუნარიანობა და ის, რეგულირდება თუ არა შესაბამისი სახელმწიფო უწყების მიერ. ამასთან, ორგანიზაციის სახელში ისეთი სიტყვების გამოყენება, როგორიცაა „საფინანსო“, „საბროკერო“ ან „საინვესტიციო“, ავტომატურად არ ნიშნავს, რომ კომპანია საქართველოს ეროვნული ბანკის მიერ არის ლიცენზირებული ან რეგულირებული.
ეროვნული ბანკი კიდევ ერთხელ მოუწოდებს მოსახლეობას, საინვესტიციო გადაწყვეტილებები მხოლოდ სანდო ინფორმაციაზე დაყრდნობით, შესაძლო რისკების სრულყოფილად შეფასებისა და გააზრების შემდეგ მიიღონ.
წყარო: საქართველოს ეროვნული ბანკი (31 ივლისი, 2026)
წყარო: https://nbg.gov.ge/media/news/erovnuli-bankis-gaprtkhil-10
სიახლეების გამოწერა
