ხელოვნურ ინტელექტს კაცობრიობის წინააღმდეგ აჯანყება შეუძლია

ხელოვნურ ინტელექტს კაცობრიობის წინააღმდეგ აჯანყება შეუძლია

Ethereum-ის თანადამფუძნებელი ვიტალიკ ბუტერინი შეშფოთებულია ხელოვნური ინტელექტის (AI) ჰიპერ განვითარებით. ის შიშობს, რომ კონტროლის მექანიზმის არარსებობის შემთხვევაში ხელოვნორ ინტელექტს აქვს პოტენციალი პლანეტის „უმაღლესი სახეობა“ გახდეს.

ბუტერინმა საკუთარ ბლოგზე სტატია გამოაქვეყნა, რომელშიც აღნიშნავს, რომ ხელოვნური ინტელექტი სხვა უძველესი და თანამედროვე გამოგონებებისგან ფუნდამენტურად განსხვავდება. იქნება ეს სოციალური ქსელები, კონტრაცეფცია, თვითმფრინავები, იარაღი, ბორბალი თუ სტამბა. AI არის ახალი ტიპის ინტელექტი, ის სწრაფად სწავლობს და ვითარდება და შესაძლოა ადამიანებს გონებრივ შესაძლებლობებს აჯობოს. ბუტერინი შიშობს, რომ ხელოვნურ ინტელექტს შეუძლია ახალი ტიპის ინტელექტი შექმნას და ის კაცობრიობის წინააღმდეგ მიმართოს.

ბუტერინი დარწმუნებულია, რომ კლიმატის ცვლილებისგან, ადამიანის მიერ შექმნილი პანდემიის ან ბირთვული ომისგან განსხვავებით, გრძელვადიან პერსპექტივაში „სუპერ გონებამ“ შესალოა დაასრულოს კაცობრიობის არსებობა და ცოცხალი არავინ დატოვოს, თუ ის ადამიანებს საკუთარი გადარჩენისთვის საფრთხედ მიიჩნევს.

ბუტერინმა ხაზგასმით აღნიშნა, რომ ასეთი განცხადებები შესაძლოა ექსტრემალურად ჟღერდეს, თუმცა ამავდროულად ის გზები განიხილა, რომლებითაც ადამიანს ხელოვნური ინტელექტის დამარცხება შეუძლია. Ethereum-ის თანადამფუძნებლის აზრით, გამოსავალი „კომპიუტერული ტვინის“ ინტერფეისების (BCI) დანერგვაა.

BCI ტვინის ელექტრულ აქტივობასა და გარე მოწყობილობას შორის ერთგვარ კავშირს წარმოადგენს. BCI–ს ადამიანსა და მოწყობილობას შორის ორმხრივი კომუნიკაციის ციკლის წამებიდან მილიწამამდე შემცირება შეუძლია, რაც ადამიანის გონებრივ ძალისხმევას მნიშვნელოვნად შეამცირებს და გამოთვლებს, მონაცემთა შეგროვებას, წინადადებების დაწყობასა და გეგმების განხორციელებას უფრო ეფექტურად გახდის შესაძლებელს.

ამგვარად, გადაწყვეტილების მიღებაზე პასუხისმგებლობა AI-ზე აღარ გადაინაცვლებს და შემცირდება ალბათობა იმისა, რომ AI კაცობრიობისთვის ზიანის მომტან მოქმედებებს თავად განახორციელებს.

„ტვინის მუშაობის გააუმჯობესება ბიოლოგიური ინოვაციების დახმარებით არის შესაძლებელი. მათი BCI-თან კომბინირების მიზნით, შესაძლებელი იქნებოდა ჩვენი გონების პირდაპირ კომპიუტერებზე სამუშაოდ „გადმოტვირთვა “. ადამიანის სხეულების ფიზიკური უსაფრთხოების უზრუნველყოფა აღარ იქნებოდა გადაუჭრელი პრობლემა, დარჩებოდა მხოლოდ მონაცემთა სარეზერვო ასლების შექმნის საკითხის გადაჭრა.“- წერს ბუტერინი.