საინვესტიციო ბანკის RBC Capital Markets-ის ანალიტიკოსები ფიქრობენ, რომ თუ Apple-ს საკუთარი კრიპტოვალუტის ბირჟა ექნება, კომპანია წელიწადში 40 მილიარდამდე დოლარის გამომუშავებას შეძლებს.
Apple-ის საბაზრო კაპიტალიზაცია 2.3 ტრილიონს შეადგენს. ანალიტიკოსებმა Apple ფინანსურ კომპანია Square-ს შეადარეს, რომელიც Twitter-ის ხელმძღვანელმა ჯეკ დორსიმ (Jack Dorsey) დააარსა. ოქტომბერში Square-მა 4709 ბიტკოინი შეიძინა 50 მილიონ დოლარად. RBC Capital Markets-ის ანალიტიკოსის, მიჩ სტივსის (Mitch Steves) გათვლებით, კრიპტოვალუტებით ვაჭრობას Square-სთვის 1.6 მილიარდის კვარტალური მოგება მოაქვს. მისი აქტიური მომხმარებლების ბაზა 30 მილიონ ადამიანს შეადგენს.
Apple-ის სამომხმარებლო ბაზა 1.5 მილიარდს შეადგენს და იმ შემთხვევაშიც კი, თუ კრიპტოვალუტის ტრანზაქციებს მხოლოდ 200 მილიონი მათგანი შეასრულებს, ეს 6.66-ჯერ მეტი იქნება ვიდრე Square-ის შემთხვევაში. ანალიტიკოსების აზრით, ციფრულ აქტივებთან მუშაობის შემთხვევაში Apple-ის წლიურმა მოგებამ შესაძლოა 40 მილიარდ დოლარს გადააჭარბოს. ამიტომ მომავალ ათ წელიწადში Apple-ს შეუძლია გახდეს კრიპტოვალუტის ბაზრის უმსხვილესი მონაწილე.
Apple-ს შეუძლია ადვილად დაფაროს კვლევებისა და სისტემის შემუშავებისთვის საჭირო ხარჯები და კონკურენცია გაუწიოს სხვა სავაჭრო პლატფორმებს. შეუძლია შექმნას დახურული და ღია სისტემები კრიპტოვალუტების გაცვლისა და ვაჭრობისთვის, რომლებიც მომხმარებლებს რეგულაციების შესრულების მოთხოვნისა და KYC პროცედურის გავლასთან დაკავშირებულ პრობლემებს მოუგვარებდა. ასევე, ანალიტიკოსების პროგნოზით Apple-ის კრიპტოვალუტის ბირჟა მომავალში ბიტკოინის აკრძალვის შესაძლებლობას შეამცირებდა.
„თუ Apple ამ გზას აირჩევს, აშშ-ს მოქალაქეებს დიდი თანხები ექნებათ ბიტკოინის და სხვა კრიპტოვალუტების სახით. ასეთ შემთხვევაში მათი აკრძალვა არ იქნება მიზანშეწონილი. გარდა ამისა, Apple-ის პროგრამული უზრუნველყოფა კლიენტების თანხებისა და მათი პირადი ინფორმაციის უსაფრთხოების უზრუნველყოფასაც შეძლებს,“ – ნათქვამია RBC Capital Markets-ის ანგარიშში.
სტივსმა ტექნოლოგიურ გიგანტს ბიტკოინში დაბანდება იმისთვის შესთავაზა, რომ კრიპტოვალუტების ბირჟის შექმნისთვის საჭირო ხარჯები ბიტკოინის ფასის ზრდის შედეგად მიღებული მოგებიდან აენაზღაურებინა. მაგალითად, თუ Apple 5 მილიარდი დოლარის ბიტკოინს შეიძენს, მისი ფასი 10%-ით გაიზრდება. კომპანია შეძლებს ამ თანხით ინიციატივის დაფინანსებას სხვა პროექტებისთვის ზარალის მიყენების გარეშე.
შეგახსენებთ, რომ რამდენიმე თვის წინ Apple-ს ბიტკოინში ინვესტირება ასევე ურჩია ETF Think Tank-ის წამყვანმა სტრატეგმა დენ ვაისკოპფმა (Dan Weiskopf) თუმცა, მან გაცილებით დიდი თანხა – 10-დან 20 მილიარდამდე დოლარი – დაასახელა. ვაისკოპფი ფიქრობს, რომ ეს ინფლაციისგან გონივრული დაზღვევა იქნებოდა.
წყარო: https://cryptopotato.com
- გამოგვეყვით ტელეგრამზე t.me/cryptonewsgeorgia
- დაემატეთ ჩვენს ჯგუფში Fb.me/groups/cryptonewsgeorgia
Comments (No)