Binance US საფონდო ბაზარზე გასვლას IPO-ს მეშვეობით აპირებს

ბირჟა Binance-ის ამერიკული განყოფილება მარეგულირებელი ორგანოების ზეწოლის მიუხედავად, საფონდო ბაზარზე გასვლას აქციების პირველადი
საჯარო განთავსებით აპირებს.

ბლოკჩეინისადმი მიძღვნილ ვირტუალურ კონფერენციაზე სახელწოდებით REDeFiNE Tomorrow 2021 სამომავლო გეგმების შესახებ Binance-ის დამფუძნებელმა
და აღმასრულებელმა დირექტორმა, ჩენპენ ჯაომ (Changpeng Zhao) ისაუბრა. მარეგულირებლებთან მიმდინარე სირთულეების მიუხედავად, Binance ტექნოლოგიური
სტარტაპიდან ფინანსურ სერვისად გარდაქმნისთვის ემზადება.

ჯაომ აღიარა, რომ მარეგულირებლებთან Binance-ის ბოლოდროინდელ დაძაბულობას ბირჟის ძლიერ მხარეს ნამდვილად ვერ უწოდებს. მიუხედავად ამისა,
იგი არ გამორიცხავს, რომ მომავალში Binance US საჯარო კომპანია გახდება. 

„ Binance US-მა უკვე დაიწყო იმის შესწავლა, თუ რა გზით არის შესაძლებელი საფონდო ბაზარზე IPO–ს მეშვეობით შესვლა. მარეგულირებელი ორგანოების
უმეტესობა ნაცნობი სქემით მუშაობს. მათთვის აუცილებელია, რომ ორგანიზაციას შტაბი და კორპორატიული სტრუქტურა ჰქონდეს. ჩვენ უკვე ვქმნით ასეთ სტრუქტურებს იმისთვის, რომ IPO-ს ჩატარება გავამარტივოთ.“- განაცხადა ჯაომ.

ის დარწმუნებულია, რომ ამის გამო ბირჟის მიმართ ნორმატიული მოთხოვნები კიდევ უფრო გამკაცრდება. მისი თქმით, Binance ყველა საჭირო მოთხოვნის დასაკმაყოფილებლად შესაბამის ზომებს აქტიურად იღებს. ამ ამოცანის გასამარტივებლად კი ბირჟას სამსახურში მარეგულირებელი ორგანოების ყოფილი თანამშრომლები აყავს. ამგვარად, ბირჟა Coinbase-სთვის კონკურენციის გასაწევად მიმდინარე წლის პირველი მაისიდან Binance US-ის აღმასრულებელ დირექტორად შეერთებული შტატების ვალუტის კონტროლის ოფისის (OCC) ყოფილი დირექტორი, ბრაიან ბრუქსი (Brian Brooks) დაინიშნა.

ბოლო პერიოდში მარეგულირებელი ორგანოების  მხრიდან Binance-ის მიმართ გაჩენილმა ყურადღებამ მის ბანკებთან თანამშრომლობაზე ძალიან უარყოფითად იმოქმედა. ცოტა ხნის წინ ბრიტანულმა ბანკმა NatWest თავისი საკრედიტო და სადებეტო საბანკო ბარათებიდან Binance-ზე დეპოზიტები მთლიანად შეზღუდა. ანალოგიურად მოიქცა ბანკი Barclays. გასულ თვეში კი ბირჟასთან ურთიერთობა კრიპტოვალუტების მიმართ მეგობრულად განწყობილმა ბანკმა Silvergate  გაწყვიტა. 

წყარო: https://bits.media

Binance US საფონდო ბაზარზე გასვლას IPO-ს მეშვეობით აპირებს