CIA ბიტკოინის კვალის მიგნება ბევრად ადვილია ვიდრე ნაღდი ფულის

აშშ-ს ცენტრალური სადაზვერვო სამსახურის ყოფილმა ხელმძღვანელმა, მაიკლ მორელმა განაცხადა, რომ მთავრობებმა ბლოკჩეინი უკანონო საქმიანობის გამოსაძიებლად უნდა გამოიყენონ.

მაიკლ მორელი (Michael Morell) გადაჭარბებულს უწოდებს მარეგულირებლების მოსაზრებას, რომ ბოროტმოქმედები ბიტკოინს ფულის გათეთრებისთვის, ტერორიზმის დაფინანსებისთვის და გადასახადებისგან თავის არიდებისთვის იყენებენ. მისი აზრით, ბლოკჩეინის ტექნოლოგია მაკონტროლებელი ორგანოებისთვის დიდი სარგებლის მომტანია. ამიტომ სახელმწიფოებმა ის უკანონო საქმიანობის აღმოჩენისა და კანონდამრღვევთა პასუხისგებაში მიცემის ინსტრუმენტად უნდა განიხილონ. ამ დასკვნამდე მორელი კრიპტოვალუტების ალიანსთან Crypto Council for Innovation (CCI) ერთობლივი კვლევების შედეგად მივიდა.

ბლოკჩეინზე ჩაწერილი ინფორმაცია ღიაა და მისი შეცვლა შეუძლებელია. ამის გამო ბიტკოინის უკანონო ტრანზაქციების კვალის მიგნება ბევრად უფრო ადვილია, ვიდრე საზღვარგარეთ გადატანილი ნაღდი ფულის. მორელის თქმით, ბოროტმოქმედებს კრიპტოვალუტები მართლაც რომ გამოეყენებინათ, სამართალდამცავებს უკანონო ფინანსური საქმიანობის ამოძირკვის საშუალება დიდი ხნის წინ ექნებოდათ.

ცოტახნის წინ კრიპტოვალუტების უკანონო საქმიანობაში გამოყენების შესახებ შეშფოთება როგორც აშშ ფინანსთა მინისტრმა, ჯანეტ იელენმა (Janet Yellen), ისე ევროპის ცენტრალური ბანკის პრეზიდენტმა, კრისტინ ლაგარდმაც (Christine Lagarde) გამოთქვეს.

თუმცა, სადაზვერვო სამსახურის ყოფილი ხელმძღვანელის აზრით, ასეთი განცხადებები არ ეფუძნება კონკრეტულ მონაცემებს და მომდინარეობს იმათგან, ვინც კრიპტოვალუტებისა და ბლოკჩეინის მუშაობის პრინციპებში არაა ჩახედული.