by Giorgi 
Robinhood დიდ ბრიტანეთში კრიპტო ვაჭრობას იწყებს
სავაჭრო გიგანტ Robinhood-ის ხელოვნურ ინტელექტზე მომუშავე აპლიკაცია გაერთიანებული სამეფოს მომხმარებლებს პლატფორმაზე კრიპტოვალუტით ვაჭრობას საკომისიოს გარეშე სთავაზობს. ამ სიახლით Robinhood-მა ბრიტანეთში თავისი პლატფორმის სრული ფუნქციონალი აამუშავა, სადაც კრიპტოვალუტით ვაჭრობა უკვე ტრადიციულ საინვესტიციო ინსტრუმენტებთან – აპლიკაციაში უკვე ინტეგრირებულ აქციებთან, ობლიგაციებთან, ოფციონებსა და ფიუჩერსებთან ერთად არის ხელმისაწვდომი.
განახლებული აპლიკაციის საშუალებით, ბრიტანელი მომხმარებლები 50-ზე მეტი დასახელების კრიპტოაქტივით ვაჭრობას შეძლებენ (მათ შორის: BTC, ETH, XRP და HYPE ). ვაჭრობა განხორციელდება კრიპტობირჟა Bitstamp-ის ბაზაზე, რომელიც Robinhood-მა 2025 წელს შეიძინა.
კომპანიამ ასევე წარადგინა ინოვაციური ინსტრუმენტი Robinhood Cortex Digests for Crypto. ეს არის ხელოვნურ ინტელექტზე დაფუძნებული ვიჯეტი, რომელიც რეალურ დროში ბაზრის ახალ ამბებსა და მონაცემებს და ტექნიკურ ინდიკატორებს აანალიზებს, ასევე მომხმარებლებს Robinhood-ის ექსკლუზიურ ანალიტიკას სთავაზობს: ხელოვნური ინტელექტი მომხმარებლებს მარტივი და გასაგები ენით აუხსნის, თუ რა კონკრეტული მიზეზები იწვევს ამა თუ იმ კრიპტოვალუტის ფასის მერყეობას.
„ჩვენი ახალი პროდუქტი გამჭვირვალე და დაბალფასიანი ალტერნატივაა ბრიტანულ ბაზარზე არსებული სხვა პლატფორმებისა, რომლებიც ხშირად ბუნდოვან საფასო პოლიტიკას ეყრდნობიან და მაღალი საკომისიოებით მომხმარებლის მოგებას ამცირებენ.“ – აცხადებენ Robinhood-ში.
ახალი ფუნქციონალი ბრიტანელი მომხმარებლებისთვის ხელმისაწვდომი ამ კვირიდან ეტაპობრივად გახდება.
გარდა ამისა, სიახლე ბრიტანელ დეველოპერებსაც შეეხებათ – მათ საკუთარი პროექტების აწყობა პოპულარულ Robinhood Chain-ზე (Layer 2 ბლოკჩეინი Arbitrum-ის პლატფორმაზე) შეეძლებათ.
„დიდ ბრიტანეთში ინვესტორების ახალი ტალღა ციფრულ აქტივებს საინვესტიციო პორტფელის მნიშვნელოვან ნაწილად მიიჩნევს. ჩვენ კიდევ ერთ დიდ ნაბიჯს ვდგამთ იმისკენ, რომ გაერთიანებულ სამეფოში მთავარ მრავალფუნქციურ საინვესტიციო პლატფორმად ჩამოვყალიბდეთ.“ – აღნიშნა Robinhood U.K.-ის პრეზიდენტმა, ჯორდან სინკლერმა (Jordan Sinclair).
Robinhood-ის გაერთიანებული სამეფოს შვილობილმა კომპანიამ დიდი ბრიტანეთის ფინანსური ზედამხედველობის ორგანოსგან (FCA) კრიპტოაქტივების სერვისების მიწოდების ოფიციალური რეგისტრაცია 2026 წლის 31 ივლისს მოიპოვა.
სიახლეების გამოწერა
