თურქული კრიპტო ბირჟები ტრანზაქციებზე ანგარიშს სახელმწიფოს

თურქული კრიპტო ბირჟები ტრანზაქციებზე ანგარიშს სახელმწიფოს ჩააბარებენ

თურქეთის ფინანსთა სამინისტრო კრიპტოვალუტის ბირჟებს დაავალდებულებს ყველა იმ ციფრული ოპერაციის შესახებ, რომელთა მოცულობა
10000 თურქულ ლირას (1200$) გადააჭარბებს, ფინანსური დანაშაულების საგამოძიებო საბჭოს (MASAK) აცნობონ.

ამის შესახებ თურქეთის ფინანსთა მინისტრმა, ლიუფტი ელვანმა (Lütfi Elvan) განაცხადა. მარეგულირებლებმა კრიპტოვალუტების ინდუსტრიასთან დამოკიდებულება თაღლითობის შემთხვევების მატებასთან დაკავშირებით გაამკაცრეს. აპრილში თურქმა სამართალდამცავებმა ბირჟა Vebitcoin-ის
რამდენიმე თანამშრომელი დააკავეს. ამავე პერიოდში ბირჟა Thodex-ის დამფუძნებელმა აქტივების მითვისება და ქვეყნიდან გაქცევა მოახერხა, რის
შედეგადაც ბირჟა იძულებული გახდა საქმიანობა შეეწყვიტა.

თურქეთის ფინანსთა სამინისტრომ MASAK-ს ქვეყანაში მოქმედი კრიპტოვალუტის ბირჟების საქმიანობის გასაკონტროლებლად მთელი რიგი უფლებამოსილებები მიანიჭა. MASAK-მა უკვე შეადგინა იმ მოთხოვნების სახელმძღვანელო, რომელიც კრიპტო ბირჟებმა უნდა შეასრულონ.

„კრიპტოვალუტის სავაჭრო პლატფორმები ახლა ვალდებულნი იქნებიან აქტიური მომხმარებლების მონაცემები MASAK-ს გაუზიარონ. ბირჟის ხელმძღვანელობას პლატფორმაზე ნებისმიერ საეჭვო ქმედებაზე სრული პასუხისმგებლობა დაეკისრება. კრიპტოვალუტის ტრანზაქციაზე, რომელიც 10000 თურქულ ლირას აღემატება, ბირჟები ვალდებულნი იქნებიან 10 დღის განმავლობაში საბჭოს აცნობონ.“ – განაცხადა თურქეთის ფინანსთა მინისტრმა.

მინისტრმა ასევე აღნიშნა, რომ კანონპროექტი საბანკო რეგულირებისა და ზედამხედველობის სააგენტოსა (BRSA) და შემოსავლების სამსახურთან თანამშრომლობით იქნა შემუშავებული. მუშაობის პროცესში კი სხვადასხვა სპეციალისტების და კრიპტოვალუტის სფეროს ადგილობრივი
წარმომადგენლების აზრი იქნა გათვალისწინებული.

ექსპერტების აზრით, თურქეთმა კრიპტოვალუტებთან და მათ დაბეგვრასთან დაკავშირებული რეგულაციები რაც შეიძლება სწრაფად უნდა შეიმუშაოს ,
რათა მომხმარებლები ციფრულ აქტივებთან დაკავშირებული საფრთხეებისგან დაიცვას. ელვანის განცხადებით, კანონპროექტის საბოლოო ვერსიას
თურქეთის პრეზიდენტს, რეჯეფ თაიფ ერდოღანს დასამტკიცებლად უახლოეს მომავალში წარუდგენენ.

წყარო: https://bits.media