აშშ-მ ბანკებისთვის კრიპტოვალუტის რეგულირების წესები განმარტა

აშშ-მ ბანკებისთვის კრიპტოვალუტის რეგულირების წესები განმარტა

შეერთებული შტატების ვალუტის კონტროლის ოფისმა (OCC) ეროვნული ბანკების და ფედერალური შემნახველი ასოციაციებისთვის კრიპტოვალუტის სფეროში საქმიანობის რეგულირების პროცესი განმარტა.

OCC-ის წერილობით განმარტებაში ნათქვამია, რომ საქმიანობაში კრიპტოვალუტების, ბლოკჩეინისა და სტეიბლკოინების გამოყენებამდე ბანკები და ფედერალური შემნახველი ასოციაციები ვალდებულნი იქნებიან ფულადი სისტემების რისკების მართვისა და კონტროლის მექანიზმების არსებობა დაადასტურონ.

ციფრულ აქტივებთან მუშაობის სურვილის შემთხვევაში, ეროვნულმა და ფედერალურმა შემნახველმა ბანკებმა ნებართვისთვის მარეგულირებელ ორგანოს უნდა მიმართონ.

კრიპტოაქტივებით ბიზნესის წარმოების დაწყება მხოლოდ მაშინ იქნება შესაძლებელი, თუ ბანკი მარეგულირებლისგან წინააღმდეგობების არარსებობის შესახებ წერილობით შეტყობინებას მიიღებს.

ОСС-ის ხელმძღვანელის მოვალეობის შემსრულებლის, მაიკლ ჰსუს (Michael Hsu) თქმით, განმარტებითი წერილი გარანტიაა იმისა,

რომ ბანკებისა და ფედერალური შემნახველი ასოციაციების კრიპტოვალუტების, განაწილებული რეესტრისა და სტეიბლკოინების სფეროში საქმიანობა უსაფრთხოდ და საიმედოდ წარიმართება.

„რადგან ამ ტექნოლოგიებიდან და პროდუქტებიდან უმეტესობა ახალ რისკებს შეიცავს, ბანკებმა უნდა დაადასტურონ, რომ შესაბამისი რისკების მართვის და კონტროლის სისტემა გააჩნიათ . ეს გაამყარებს სანდოობას, რომ მათი საქმიანობა ფედერალური მარეგულირებელი კანონმდებლობის ფარგლებში ხორციელდება.“- თქვა მან.

წერილს ინსტრუქცია ახლავს, რომლის დახმარებითაც ბანკებს მარეგულირებელთან კონტაქტი და კრიპტოვალუტის სფეროში საქმიანობის განზრახვის შესახებ წერილობითი მიმართვა შეუძლიათ.