ინვესტორებმა Aave-დან მილიარდი დოლარის აქტივები გაიტანეს

სახსრების მასობრივი გადინება მას შემდეგ დაიწყო, რაც იმ პირებმა, რომლებმაც KelpDAO გატეხეს Aave-ზე 195 მილიონი დოლარის (82,600 ETH) კრედიტი გააფორმეს, რისთვისაც გირაოდ არარსებული rsETH ტოკენები გამოიყენეს. ბლოკჩეინ-ექსპერტების განმარტებით, შედეგად Aave-ს გაუჩნდა ე.წ. „უიმედო ვალი“ – ვალი, რომელიც არაფრით არის უზრუნველყოფილი.

მსხვილი ინვესტორებიდან Aave-დან სახსრები გამოიტანეს:

• კრიპტობირჟამ MEXC – 431 მილიონი დოლარი;

• ინვესტორმა, რომლის ანგარიშიც 0x7CD0-ზე იწყება – 405,7 მილიონი დოლარი (Lookonchain ამ საფულეს საინვესტიციო კომპანია Nonco-ს უკავშირებს);

• ბრიტანული საინვესტიციო კომპანია Abraxas Capital – 392 მილიონი.

ამ სიახლეების ფონზე, პლატფორმის მშობლიური ტოკენის (AAVE) ფასი თითქმის 20%-ით დაეცა, რამაც მსხვილ მფლობელებს აქტივების გაყიდვისკენ უბიძგა. ბლოკჩეინ-ანალიტიკის თანახმად, მხოლოდ სამმა წვრილმა ინვესტორმა დაახლოებით 6 მილიონი დოლარის 60,000-მდე ტოკენი მოიშორა.

Kelp-ის ინციდენტის შესახებ ინფორმაციის გავრცელებისთანავე, Aave-მ V3 და V4 ვერსიებზე rsETH-ის ბაზრები გაყინა. თუმცა, ბოროტმოქმედების მიერ აღებული კრედიტი პლატფორმაზე კვლავაც ღიაა.

ბოლო თვეების განმავლობაში საკრედიტო პლატფორმა შიდა უთანხმოებებსა და პარტნიორების დაკარგვას განიცდის. აპრილის დასაწყისში Aave-ს მთავარმა რისკ-მენეჯერმა, კომპანია Chaos Labs-მა, ეკოსისტემასთან სამწლიანი თანამშრომლობის შეწყვეტის შესახებ გამოაცხადა. მიზეზად კომპანიისთვის პროტოკოლის მართვის წესების მიუღებლობა დასახელდა.

ცოტა ხნით ადრე, მსგავსი გადაწყვეტილების შესახებ პროექტის პარტნიორებმა — BGD Labs-მა და Aave Chan Initiative (ACI)-მაც განაცხადეს. ისინი პლატფორმის პროგრამებისა და განახლებების მთავარი დეველოპერები იყვნენ. Chaos Labs ეკოსისტემის ბოლო მსხვილი ტექნიკური მონაწილე იყო. Aave-ს წევრებს შორის დაპირისპირება დეკემბერში CoW Swap-ის ახალი ინტეგრაციის საკომისიოების გამო დაიწყო, რომლიდან მიღებული სარგებელიც მთლიანად კომპანია Aave Labs-ს დაერიცხა.