ირანის ხელისუფლების კრიპტორეზერვების სავარაუდო მოცულობა დასახელდა

ირანის ხელისუფლების კრიპტორეზერვების სავარაუდო მოცულობა დასახელდა

ტელეკომპანია FOX Business-ის ცნობით, საფრთხეების ანალიზის ანონიმურ სერვისზე დაყრდნობით, გავრცელდა ინფორმაცია, რომ ირანის ხელისუფლება 7,7 მილიარდი დოლარის კრიპტოვალუტას აკონტროლებს. ჟურნალისტების განცხადებით, ისლამური რესპუბლიკის ხელისუფლება გლობალური საბანკო სისტემის შეზღუდვებისა და საერთაშორისო სანქციებისთვის გვერდის ავლის მიზნით კრიპტოვალუტებს აქტიურად იყენებს.

ტელეკომპანიის მიერ გამოკითხული ექსპერტები კრიპტობირჟების წინააღმდეგ ამერიკის მხრიდან ახალ სანქციებს ელოდებიან – ამ გზით აშშ-ის ხელისუფლება ირანული კრიპტოაქტივების ბლოკირებას ცდილობს.

ამავდროულად, სააგენტო Reuters-მა გამოაქვეყნა ჟურნალისტური გამოძიება, რომლის მიხედვითაც, ირანის უმსხვილესმა კრიპტობირჟამ Nobitex 2023 წლის დასაწყისიდან მოყოლებული, Tron-ისა და BNB Chain-ის ბლოკჩეინების საშუალებით სულ მცირე 2,3 მილიარდი დოლარის ტრანზაქციები დაამუშავა. ჟურნალისტების მონაცემებით, Tron-ის ქსელზე 2 მილიარდ დოლარზე მეტი მოდის, ხოლო BNB Chain-ზე – არანაკლებ 317 მილიონი დოლარისა. აშშ-ისა და ისრაელის ირანთან ომის დაწყების შემდეგაც კი, ამ ქსელებში ფულის მოძრაობა არ შეჩერებულა : BNB Chain-ის მეშვეობით მინიმუმ 22,6 მილიონი დოლარის, ხოლო Tron-ის საშუალებით – არანაკლებ 550 000 დოლარის ტრანზაქციები განხორციელდა.

ირანის ცენტრალურმა ბანკმა Tron-ის პლატფორმა 2024 წლის ნოემბრიდან 2025 წლის ივნისამდე პერიოდში 500 მილიონ დოლარზე მეტი ღირებულების სტეიბლკოინების (მათ შორის USDT-ის) შესაძენად გამოიყენა. Reuters-ის ცნობით, ამ სახსრების ნაწილი მოგვიანებით Nobitex-ზე გადაირიცხა.

თავად Nobitex-ი ირანის ხელისუფლებასთან პირდაპირ კავშირს უარყოფს და აცხადებს, რომ ნებისმიერი უკანონო სახსრები, ასეთის არსებობის შემთხვევაში, ბირჟის მენეჯმენტთან შეუთანხმებლად ხორციელდება.

ირანის საკითხების სპეციალისტმა, რიჩ სანდერსმა (Rich Sanders) ჟურნალისტებთან საუბრისას ვარაუდი გამოთქვა, რომ Nobitex-ის გავლით განხორციელებული ტრანზაქციების რეალური მოცულობა შესაძლოა ბევრად უფრო დიდია, რადგან  მხოლოდ იმ საფულეების შემოწმება ხერხდება, რომლებიც  ბირჟას დაზუსტებით ეკუთვნის. ამავდროულად, ირანული პლატფორმა საჯაროდ აღიარებს, რომ მისამართებს ხშირად ცვლის, რათა გზავნილების მიკვლევა და ჩაჭრა გაართულოს.

Reuters-ის პუბლიკაცია ჰორმუზის სრუტეში გამავალი ტანკერებისთვის განკუთვნილი ციფრული პლატფორმის – Hormuz Safe-ის გაშვების შესახებ  ირანის ეკონომიკისა და ფინანსთა სამინისტროს განცხადებას დაემთხვა. ირანელი მაღალჩინოსნების დაპირებით, აღნიშნული სერვისი ბიტკოინითა და სხვა კრიპტოვალუტებით გადახდას უზრუნველყოფს.

მანამდე აშშ-ის ფინანსთა მინისტრმა, სკოტ ბესენტმა (Scott Bessent) განაცხადა, რომ ამერიკის ხელისუფლებამ თითქმის 500 მილიონი დოლარის ირანული კრიპტოვალუტის აქტივები დააყადაღა.