უკრაინამ სახელმწიფო კრიპტოვალუტის გამოშვების უფლება მოიპოვა

უკრაინამ სახელმწიფო კრიპტოვალუტის გამოშვების უფლება მოიპოვა

უკრაინის უმაღლესმა რადამ მეორე მოსმენით საგადახდო მომსახურების შესახებ კანონი მიიღო. კანონი უკრაინის ცენტრალურ ბანკს
უფლებას აძლევს გამოუშვას სახელმწიფო კრიპტოვალუტა, რომელიც კანონიერ საგადახდო საშუალებად იქნება აღიარებული.

30 ივნისს უკრაინის უმაღლესი რადის დეპუტატების უმრავლესობამ მხარი №4364 კანონპროექტს დაუჭირა, რომლის ძალაში შესვლისთანავე
უკრაინის საგადახდო ბაზარზე კომპლექსური ცვლილებები გატარდება.

ახალ კანონში მომავალი სახელმწიფო კრიპტოვალუტა მოკლედ არის მოხსენიებული. თუმცა, უკვე ოფიციალურად, ჯერ არგამოშვებული ციფრული
გრივნა ნაღდ ფულთან და საბანკო და ელექტრონულ გადახდებთან არის გათანაბრებული. კანონში განმარტებულია: „უკრაინის ეროვნული ბანკის
ციფრული ფული – არის უკრაინაში საანგარიშსწორებო ვალუტის ელექტრონული ფორმა , რომლის გამოცემას უკრაინის ეროვნული ბანკი ახორციელებს”.

დოკუმენტის თანახმად, უკრაინის ეროვნული ციფრული ვალუტა გადახდის კანონიერი საშუალებაა, „ციფრული ფულის გამოყენება კი შესაძლოა მოხდეს
უკრაინის კანონმდებლობის და უკრაინის ეროვნული ბანკის რეგულაციების შესაბამისად“. კანონში გამიჯნულია ელექტრონული ფულისა და სახელმწიფო
კრიპტოვალუტის მცნებები. ეროვნული ციფრული ვალუტით გადახდების განხორციელების წესს, აგრეთვე გაცემის, შენახვისა და გამოსყიდვის წესებს ცენტრალური
ბანკი განსაზღვრავს.

უკრაინის ეროვნულმა ბანკმა ციფრული გრივნის ტესტირება წლის დასაწყისში დაასრულა. მაშინ ბანკმა განაცხადა, რომ ციფრულ ვალუტაში ბევრ უპირატესობას ხედავს,
თუმცა შიშობს, რომ ამან შეიძლება ტრადიციულ საბანკო სისტემას ზიანი მიაყენოს. გასულ ზაფხულს უკრაინის ცენტრალურმა ბანკმა ტესტირების ფარგლებში ეროვნული
ციფრული ვალუტის შეზღუდული რაოდენობა გამოუშვა.

წყარო: https://bits.media

უკრაინამ სახელმწიფო კრიპტოვალუტის გამოშვების უფლება მოიპოვა